07 July 2016

ကျေးဇူးရှင် ဆားတောင် ဆရာတော် ဘုရားကြီး ၏ သြ၀ါဒတော်များ

မြတ်ဗုဒ္ဓ ၏ သာသနာ's photo.
(၁) ဘယ် ပုဂ္ဂိုလ်ပဲဖြစ်ဖြစ် တရား ကတော့ အားထုတ်ရမှာပဲ။ အားထုတ်ခွင့် ကြုံတုန်း အားထုတ် ကြ။ သာသနာပပြီ ဆိုရင် ၀ိပဿနာ နဲ့ တွေ့ရမှာ မဟုတ်ဘူး။ ဒီတော့ ပိုနစ်နာတယ်။

(၂) တရား အားထုတ်ဖို့တော့ မအားဘူး။ မအားဘူး လို့ ပြောကြတယ်။ သေ ချိန် ကျလာလို့ မသေ ချင်ဘူး လို့ ပြောလို့ရတာ မဟုတ်ဘူး။ မအားဘူး လို့ ပြောလို့ရတာ မဟုတ်ဘူး။

(၃) တရား အားထုတ်တယ် ဆိုတာ အားနဲ့ မာန်နဲ့ အားထုတ်ရတယ်။ မသေချာ မရေရာ တဲ့ အ လုပ်တွေတောင် မှ ဟုတ်နိုးနိုး၊ တော်နိုးနိုး နဲ့ သက်စွန့်ဆံဖျား လုပ်နေရတာပဲ။ သေချာရေရာတဲ့ အလုပ် ဘာ မလုပ်ရဲစရာ ရှိလဲ။ ဆင်းရဲ တစ်ဘ၀ပေါ့။ တစ်ဘ၀တောင် မှ ခဏလေးပါ။

(၄) ထိတိုင်း ထိတိုင်း သိနေပါစေ။ ကိလေသာ ကြား မခိုစေနဲ့။

(၅) တရား အားထုတ်တယ် ဆိုတာ ထမင်း စားသလိုပဲ။ မဆာလည်း စား၊ ဆာလည်း စား။ စားကောင်းလိမ့် မယ် ထင်ပေမယ့် တစ်ကယ် စားတော့ မြိန်ချင်မှ မြိန်တာ။ မကောင်းဘူး ထင်လို့လည်း တစ်ကယ်စားတော့ မြိန်ချင်မြိန်တာ။ ဒီတော့ အားမထုတ်ချင်လည်း ထုတ်။ ထုတ်ချင် လည်း ထုတ်ပေါ့။

(၆) ၀ိပဿနာ တရား အားထုတ်ရတာ အလွန်ကောင်းပါတယ်။ အ၀တ် လည်း ပြောင်းစရာ မလိုဘူး။ ဂူလည်း အောင်းစရာ မလိုဘူး။ ပုထုဇဉ် စရိုက်မူ ပြောင်းဖို့ လိုတယ်။

(၇) ကိုယ့် ခန္ဓာ ကိုယ်ရှု သူများ အပြစ် သွားရှုမနေနဲ့။ သူများ အပြစ် သွားရှုနေ တော့ အမှုပွေတာပေါ့။

(၈) မိမိ ခန္ဓာက ဖြစ်ပေါ်နေတဲ့ ဝေဒနာ ကို သည်းခံ ရှုမှတ်နိုင်မှ ပတ်ဝန်းကျင် ရဲ့လောကဓံတွေ ကိုလည်း ခံနိုင်ရည် ရှိမယ်။

(၉) တရားအားထုတ်တဲ့ အခါ ကိလေသာ ကြား မခိုအောင် နှာသီးဝလေး ကို ထိတိုင်း သိနေပါစေ။ ထိတဲ့ အပေါ် သတိထား။ သတိထားရင် တရားမြင်မယ်။ သတိ မထားရင် အမှားဝင်မယ်။

(၁၀) အရိယာ သူတော်ကောင်းတို့ ဆိုတာ ရုပ်ရယ်၊ နာမ်ရယ်၊ တရားရယ်၊ ဒီ သုံးဦးနဲ့ ပဲ အဖော်ပြုနေတာ ပါ။ သူတို့မှာ ပျင်းတယ် မရှိပါဘူး။

(၁၁) လူ သာဓုခေါ် နတ် သာဓုခေါ်လောက်နဲ့ ကျေနပ် တင်းတိမ် မနေကြနဲ့။ ဘုရား ရဟန္တာ အရိယာ သူတော်ကောင်းတွေ ချီးမွမ်းတဲ့ အထိ ဖြစ်ပါစေ။

(၁၂) ပထမတော့ တရား ကို လူက ဦးဆောင်တယ်။ နောက်တော့ တရား က လူကို ဦးဆောင် တယ်။ အဲဒီ အချိန် လူက တရားနောက် ကို လိုက်ဖို့လိုတယ်။

(၁၃) ခန္ဓာကတော့ သူ့တရား သူ ပြနေတာပဲ။ လောဘ ဒေါသ မောဟ ဖုံးနေ တော့ ဘာမှ မသိလိုက်ရ ဘူး။

(၁၄) အားကိုး မမှားစေနဲ့။ မိမိကိုယ် ကို မိမိ အားကိုးရမယ်။



(၁၅) ဘာမဆို အတွင်းက အေးနေအောင် လုပ်ရတယ်။ အပြင်က ဘယ် လောက် ပူပူ အတွင်း က အေး နေတော့ အေးတာပဲ။ အပြင်က ဘယ်လောက် အေးအေး အတွင်း က ပူတော့ ပူတာပဲ။

(၁၆) တရားနှင့် အိပ်စက်ခြင်း တရားနှင့်နိုးထခြင်း၊ တရားနှင့် မွေ့လျော်ခြင်း၊ ဒါ အပ္ပမာဒ တရားပဲ။

(၁၇) လောကီ…ချမ်းသာက တစ်ဘ၀စာ တစ်နပ်စာ။ လောကုတ္တရာ ချမ်းသာက မှ တစ်သံသရာလုံး အေး တာ။ တစ်ဘ၀ တစ်နပ်စာ မလုပ်နဲ့။ တစ်သံသရာလုံးစာ လုပ်ကြ။

(၁၈) မကောင်းတာ လုပ်တာသာ ကြောက်ရမှာ။ ကေင်းတာ လုပ် တာ ကြောက်စရာမလိုဘူး။ မကောင်း တာတောင် ရဲရဲ လုပ်ရဲရင် ကောင်းတာ လုပ်တာ ဘာ မလုပ်ရဲစရာ ရှိသလဲ ?

(၁၉) မဟုတ်လည်း သည်းခံ၊ ဟုတ်လည်း သည်းခံရမှာပဲ။ ခံရမည့် အတူတူ တော့ အခု ကတည်းက ခံလိုက်တော့ သံသရာ ပြတ်တာပေါ့။

(၂၀) လောဘ ဒေါသ မောဟ ကင်းအောင် ပြတ်အောင် လုပ်ကြ။ ဖြစ် အောင်လဲ မလုပ်နဲ့။ ပျက်အောင် လဲ မလုပ်နဲ့။ ဖြစ်တာပျက်တာ အမြဲ သိနေ ပါစေ။ ဖြစ်အောင်လုပ်တာ လောဘ။ ပျက်အောင် လုပ်တာ ဒေါသ ။ ဖြစ်တာ ပျက်တာ မသိတာ မောဟ။

(၂၁) စိတ်ကဖြတ်လို့ ပြတ်တာ မဟုတ်ဘူး။ တရားကဖြတ်မှ ပြတ်တာ။ တရားရှိအောင် အားထုတ်ကြ။ တရား ရှိတော့ တရား ကပဲ ဖြတ်ပေး တယ်။ ပြတ်ပေးတယ်။ ပါယ်ပေးတယ်။

(၂၂) အမြတ် က မရှုံးစေနဲ့။ အရှုံး ကသာ မြတ်ပါစေ။ အကုသိုလ် က ကုသိုလ် ဖြစ်ပါစေ။ ကုသိုလ်က အကုသိုလ် မဖြစ်ပါစေနဲ့။

(၂၃) ပုထုဇဉ်တွေ မကောင်းတာ လုပ်တာများ အဆန်း လုပ်မနေနဲ့။ အခု လည်း မကောင်းတာ လုပ်နေ သလို နောင်လည်း မကောင်းတာ လုပ်နေဦး မှာပဲ။ သူတို့ မကောင်းတာ နဲ့ ကိုယ်နဲ့ ဘာဆိုင်သလဲ ? ကိုယ့် တရား ကိုယ်ရှုဖို့ပဲ လိုတယ်။

(၂၄) ဘုရား စကား နားလည်အောင်လုပ်။ ဘုရား စကား နားလည်ရင် လောက စကားတွေအားလုံး နားလည် တယ်။

(၂၅) နိဗ္ဗာန် မဂ်ဖိုလ် ရလိုကြောင်းနဲ့ ဆုတောင်းခဲ့တာလည်း များလှပြီ။ ၀ိဇ္ဇာဥာဏ် မပါ ဓမ္မတာတောင်း မို့ အာညောင်းရုံပဲ မောဖတ်တင်မည်။

ဒါနပြု ကာ အခါခါတောင်းလည်း ငါကောင်းချင်မှု ခုခံနေသည်။ ငါတစ်လုံး ပါယ် ကာကွယ်ကာပေးမှ လွန်စွာ မနှေး နိဗ္ဗာန်မြင်မည်။



[ဆားတောင် ဆရာ တော် ဘုရားကြီး၏ "ထေရုပတ္တိနှင့် ကိုယ်တွေ့ဖြစ်ရပ်များ" စာမျက်နှာ 30 မှ-32]

 မြတ်ဗုဒ္ဓ ၏ သာသနာ

No comments:

Post a Comment