တာဝတိံသာ နတ်ပြည် မှာ . . .
မာလာဘာရီ လို့ အမည်ရတဲ့ နတ်သား တစ်ပါးရှိတယ်။ သူ့မှာ ဇနီးမယား နတ်သမီး တစ်ထောင် ရှိတယ်။ တစ်နေ့ ဥယျာဉ်ထဲ ကစားနေတုန်း နတ်သမီး တစ်ပါးဟာ စုတိစိတ် ကျပြီး သေသွားတယ်။ သာဝတ္ထိမြို့ မှာ မိန်းကလေး တစ်ယောက်ပဲ သွားဖြစ်တယ်။
သူမဟာ နောက်ဘဝကို ပြန် အမှတ်ရတဲ့ ဇာတိဿရ ဉာဏ် ပါလာတယ်။ နတ်သမီး ဘဝကို ပြန် အမှတ်ရတယ်။ ဒါကြောင့် ကုသိုလ်ပြုတိုင်း မာလာဘာရီ နတ်သား ၏ မယား နတ်သမီး ဖြစ်ရပါလို၏ လို့ အမြဲဆုတောင်းတယ်။
ထုံးစံအတိုင်း အရွယ်ရောက် အိမ်ထောင်ကျ သားသမီး ငါးယောက် ရပြီးချိန်မှာ သေသွားတယ်။ သူ့ ဆုတောင်း အတိုင်း သာဝတိံသာနတ်ပြည် ပြန်ရောက်တယ်။ ဒါက အံ့သြစရာ မဟုတ်သေးဘူး။ တစ်ကယ် အံ့သြစရာက မာလာဘာရီ နတ်သား နဲ့ ဇနီးမယားတွေဟာ အခုချိန်ထိ ဥယျာဉ်ထဲမှာ ပျောပါးဆော့ကစားတုန်းပဲ။
ပတိပူဇိကာ နတ်သမီး ကိုတွေ့တော့ မာလာဘာရီ နတ်သား ကမေးတယ်။
နတ်သား = သင်စောစောက ဘယ်သွားလဲ ?
နတ်သမီး= စောစောက မဟုတ်ဘူး။ နတ်သက်ကြွေ သေသွားပြီး သာဝတ္ထိမှာ မိန်းကလေး သွားဖြစ်တယ်။ အသင် နတ်သား ကို သတိရတဲ့ အတွက် ကုသိုလ် များများပြုပြီး ဒီနေရာ ပြန်ရောက်ဖို့ ဆုတောင်းခဲ့ရတယ်။ အရွယ်ရောက် အိမ်ထောင်ကျတော့ ကလေးငါးယောက် ရပြီး သေဆုံးခဲ့လို့ အခုလို နတ်ပြည်ကို ပြန်ရောက်လာတာပါ။
နတ်သားဟာ အလွန်အံ့သြသွားတယ်။ လူ့ဘဝ သက်တမ်း တစ်ခုဟာ သူတို့ နတ်တွေ ဥယျာဉ် မှာ တစ်ခါပျော် ချိန်လောက်မှ မကြာဘဲကိုး။ မြစ်တွေချောင်းတွေက ရေကို မတွေ့ဖူးတဲ့ နွားခြေရာခွက်ထဲက ဖားသူငယ်ဟာ သူ့ခြေရာခွက်ထဲက ရေကိုသာ အများကြီးလို့ ထင်နေသလို . . . နတ်တွေ , ဗြဟ္မာတွေ ရဲ့ သက်တမ်းကို မသိကြတဲ့ လူတွေဟာလည်း ကိုယ့် လူ့ဘဝ သက်တမ်းလေး တစ်ရာကို အရှည်ကြီးလို့ ထင်နေကြတာပါ။
နတ်သား က ဆက်မေးတယ်။
နတ်သား= ဒီလောက် သက်တမ်း တိုတိုနဲ့ နေကြရတဲ့ သူတွေဟာ ရသမျှ အချိန်လေးမှာ ကုသိုလ် ပါရမီများများ ဆည်းပူးကြရဲ့လား ?
နတ်သမီး= ဘဝတန်ဖိုး သိပြီး ကုသိုလ် ပါရမီ ဆည်းပူးကြတဲ့ လူသားဟာ တစ်ရာ မှာ တစ်ယောက်ခန့်သာ အနည်းငယ် ရှိပါတယ်။
ကျန် လူသားများကတော့ အာရုံငါးပါး ကာမဂုဏ် တရားတွေကို ရှာဖွေ ခံစားရင်း အချိန်ကုန်ကြပါတယ်။
နတ်သား ဟာ ပိုအံ့သြသွားတယ်။ လူ့သက်နှစ်တစ်ရာဟာ နတ်သက် တစ်ရက်သာ ရှိလို့ ပထမ အံ့သြစရာပေါ့။
အချိန်တိုလှတဲ့ လူ့ဘဝလေးကို ကုသိုလ် ပါရမီ ဆည်းပူးဖို့ အသုံးမချဘဲ ကာမဂုဏ် ခံစားဖို့ချည်း အသုံးချတာဟာ ဒုတိယမြောက် အံ့သြစရာပေါ့။
ဒါ့ကြောင့် ဗုဒ္ဓက ဓမ္မပဒ မှာ ဟောထားတယ် ။
သမင်သည် ပြည်တန် ပတ္တမြားကို မြင်သော်လည်း တန်ဖိုး မသိသည့်အတွက် မြက် ကိုသာ စားပြီး တောထဲဝင်သကဲ့သို့ ..
ပညာမရှိသော လူသည် အလွန် အဖိုးတန်သော ဘဝ ကို ရနေသော်လည်း တန်ဖိုး မသိသည့် အတွက် ကာမဂုဏ် ကို ခံစားပြီး အပါယ်လေးပါးသို့ သွားတယ်တဲ့။
လူ့ဘဝဟာ အဖိုး အတန်ဆုံးပါ။
ဒါပေမယ့် တန်ဖိုး သိတဲ့လူ အတွက်သာ တန်ဖိုး ရှိတာပါ။ တန်ဖိုး မသိတဲ့ လူအတွက် တန်ဖိုးမရှိပါဘူး။
ယာသမား တစ်ယောက်ဟာ လှည်းသွားလမ်း ကနေ ကျောက်စိမ်းကြီး တစ်တုံး တွေ့တယ်။
အရည် အသွေးကောင်းတာကို မသိဘူး။
ဒါကို သိတဲ့ ကျောက်ပွဲစားက ငါးသိန်းပေးပြီး ဝယ်တယ်။ ယာသမား ဟာ ငါးသိန်း ရတာကို ဝမ်းသာမဆုံးဘူး။ ငါးသိန်းလောက်ပဲ တန်ဖိုး သိတော့ ငါးသိန်းပဲ ရတယ်။
ကျောက်ပွဲစားက ကျောက်တွင်း သူဌေးကို သိန်း ၅၀ နဲ့ ရောင်းတယ်။ သိန်း ၅၀ တန်ဖိုးပဲ သိတော့ သိန်း၅၀ ရတယ်။ ကျောက်တွင်း သူဌေးက ဝယ်ပြီး တစ်ဖက်နိုင်ငံကို သွားရောင်းတဲ့ အခါ သိန်းငါးရာ ထိ ရသွား တယ်။
ဒီ ဥပမာအတိုင်းပဲ . . .
ရလာတဲ့လူ့ ဘဝ ကို ကာမဂုဏ် ခံစားဖို့ အတွက်လောက်ပဲ တန်ဖိုး သိရင် ကာမဂုဏ် ခံစားဖို့ အတွက် လောက် ပဲ တန်ဖိုးရှိမှာ။
လူနတ် ချမ်းသာ ရဖို့လောက်အတွက်ပဲ တန်ဖိုး သိရင် လူနတ်ချမ်းသာ ရဖို့လောက်ပဲ တန်ဖိုးရှိမှာ။
အို , နာ , သေ ကင်းရာ နိဗ္ဗာန် ချမ်းသာ ရဖို့လောက် တန်ဖိုး သိရင် အို , နာ, သေ ကင်းရာ နိဗ္ဗာန် ချမ်းသာ ရဖို့ထိတန်ဖိုး ရှိမယ်။
Credit : ( မေတ္တာရှင် ရွှေပြည်သာ -လူငယ်များအတွက် ဂမ္ဘီရဝိပဿနာ ) မှ ပူဇော်ပါ၏။
No comments:
Post a Comment