သူ့ အကုသိုလ် နဲ့ သူ

ဒေါ်ဘုတ်ဆုံကြီး က ရွာထဲမှာ စုန်း လိုလို မှော် လိုလို အောက်လမ်း ဆရာမ ကြီး။ တံတားကျိုး ရွာမှာ နာမည်ကြီး။ သူ့ဆို တစ်ရွာလုံးက ကြောက်ကြတယ်။ တစ်ခုခုဆို ဒေါ်ဘုတ်ဆုံ ဆီပဲ ပြေးကြတယ်။

ဖြစ်ပုံက ဒီလိုဗျ......
ကျနော့် သူငယ်ချင်း အမေ က ရွာမှာဆို အရမ်း အချမ်းသာကြီး မဟုတ်ပေမဲ့ အသင့်အတင့် ရှိတယ်။
တစ်နေ့ သူတို့ အိမ်မှာ ဒေါ်ဘုတ်ဆုံက ပိုက်ဆံချေးသွားတယ်။ မပေးချင်ပေမဲ့လည်း ပညာ ကိုကြောက်လို့ ပေးလိုက်တာပေါ့။ တစ်လ ကုန်တော့ ကျနော့်သူငယ်ချင်းက အကြွေး သွားတောင်းလိုက်တာ။ ကျနော်က တစ်ဖက်ရွာ ကို သွားနေလို့ မသိလိုက်ဘူး။

ညနေ ကျနော်ပြန်လာတော့ သူနဲ့ အတူ လက်ဖက်ရည် အတူထိုင်သောက်ပြီး သူက.......

 "ငါ ဒေါ်ဘုတ်ဆုံဆီမှာ အကြွေး သွားတောင်းတယ်ကွ"
"ဟုတ်လား၊ ရရဲ့လား "
"မရပါဘူးကွာ ၊ ငါလည်း စိတ်တိုတာနဲ့ ဆောင့်အောင့်ပြီးပဲ ပြန်လာခဲ့တာ ဘာမှတော့ မပြောခဲ့ပါဘူး ကြောက် လို့ "တဲ့ သူပြောပြတယ်။

အဲ့ဒါ နဲ့ ကျနော်နဲ့ သူနဲ့ လမ်းခွဲပြီး အိမ်ပြန်လာခဲ့တယ်။ မနက်မိုးလင်းတော့ သတင်းဆိုးက ဆီးကြိုနေတယ်။
သူငယ်ချင်း တစ်ယောက် ဆေးရုံရောက်လို့တဲ့။ အဲ့ဒါနဲ့ မော်လမြိုင်ဆေးရုံ ကို ချက်ချင်း လိုက်တာပဲ။ မော်လမြိုင်ဆေးရုံရောက်တော့ သူငယ်ချင်းနေတဲ့ အခန်းထဲမှာ သူ့အမေ နဲ့ အဖေ နဲ့ အမျိုးတွေ ရောက်နေကြတယ်။

ကျနော်လည်း သူငယ်ချင်းရဲ့အနား ကို ကပ်ပြီး ၊ ဘာဖြစ်တာလဲ လို့မေးတော့။ သူက "ဗိုက် အရမ်းအောင့်လာပြီး လူ တစ်ယောက်က လည်ပင်း လာညှစ် သလို အသက်ရှု ကျပ်လာတယ်တဲ့။ အဲ့ဒါ ပြီးတော့ ဗိုက်က မခံနိုင်အောင် အောင့် လာတော့ အမေ့ ကို ခေါ်တော့တာပေါ့ တဲ့။ ပြီးတော့ အိမ်က ကားနဲ့ ပဲ ဆေးရုံ ကို ညတွင်းချင်း ပြေးတာ၊ခုမှ သက်သာတယ်တဲ့။"

" အေးပါကွာ၊ သက်သာပြီ ဆိုတော့ ကောင်းတာပေါ့ကွာ၊ ငါလည်း ကြားကြားချင်း လိုက်လာခဲ့တာ။"
နေ့လည်ပိုင်းလောက်ရောက်တော့ အမျိုးတွေက သက်သာပြီ ဆိုတော့ ပြန်ကုန် တာပေါ့။ ကျနော် ရယ် သူငယ်ချင်း တစ်ယောက်ရယ် အခန်းထဲမှာ အားလုံးပေါင်းမှ သုံးယောက်ပဲ ကျန်တော့တယ်။ အဲ့ဒီ အချိန် မှာ ကျနော့် သူငယ်ချင်းက ထဖောက်ပါလေရော။ ပါးစပ် က တစ် အား အား ဗိုက်အောင့်တယ်၊ လို့အော်နေ တယ်။ ခဏကြာတော့ သူ့ လည်ပင်းကို သူကိုင်ပြီး လွှတ် လွှတ် လို့အော်နေတယ်။


ကျနော်တို့ နှစ်ယောက်က ကြောင်ပြီး ကြည့်နေတယ်။ ကျနော် က သတိ ဝင်ပြီး ဆရာဝန် သွားပြေးခေါ်တယ်။ ခဏကြာတော့ လူနာ ရဲ့ မိဘတွေ ပြန်လာတာ လမ်းမှာတွေ့တယ်။ သူတို့ကိုပြောပြတော့ သူတို့လည်း ဆရာဝန် နဲ့ အတူ ပြေးလာကြတယ်။ အခန်းထဲရောက်တော့ သူငယ်ချင်း တစ်ယောက်ကကြောင်ပြီး ကြည့်နေတုန်း။

ဆရာဝန် နဲ့ သူနာပြုတွေ ဝိုင်းပြီး ချုပ်တာ မရဘူးဗျာ။ အား အတော်ကောင်းတယ်ဗျ။ ဖမ်းမနိုင်ဘူး၊ တစ်ခန်းလုံး ပွက်လောရိုက်နေတာ။ဘယ်က ဘယ်လိုရောက်လာတဲ့ လူကြီးလဲ မသိဘူး၊ သူက အားလုံးကို
" ဘေးဖယ် ဘေးဖယ် ငါလုပ်ပေးမယ် "ဆိုတော့ အားလုံး အကြည့်က သူ့ဆီရောက်သွားကြတယ်။

အားလုံးက ကြောင်ပြီး ဘေးကို ရှယ်ပေးလိုက်ကြတယ်။
သူက လူနာ ရဲ့အနား ကိုရောက်လာတယ်။ ပါးစပ် က ဘာတွေ ရွတ်လို့ ရွတ်မှန်း မသိရွတ်နေတာ။  ခဏ   ကြာတော့ လူနာက ငြိမ်ကျသွားတယ်။ ပါးစပ်က ရွတ်နေတာမရပ်သေးဘူး။

နာရီဝက်လောက်ကြာမယ်။ မျက်နှာမှာ ချွေးတွေ ပြည့်နေပြီ၊ အကုန်လုံး ကလဲ ကြောင်ပြီး ကြည့်နေတယ်။ ရွတ်နေရင်းနဲ့ ဖန်ခွက် တစ်လုံးကို လက်က ကိုင်ထားတယ်။ ခဏကြာတော့ ဘယ်က လာတဲ့ အငွေ့ မည်းမည်းတွေလဲ မသိဘူး၊ ဖန်ခွက်ထဲမှာ လာစုနေတာ။ ဝင်လာတာ ကို ရှင်းရှင်း လင်းလင်း မြင်လိုက်ရတယ်။

ဖန်ခွက် ကို လက်နဲ့ ပိတ်လိုက်ပြီး ပါးစပ် က ရွတ်တာ ကို ရပ်လိုက်တယ်။ ပြီးတော့ လူနာ ရဲ့ မိဘ ကို ကြည့်ပြီး
"ကောင်လေးက ပြုစား ခံရတာ ၊သူ့ကိုပြုစားတဲ့ သူကို ကျုပ် ဖမ်းထားပြီးပြီ ၊ ဘယ်လိုဖြစ်စေချင်လဲ၊ "
"တစ်ခါထဲ ရှင်းပစ်လိုက်ပါ ဆရာကြီး"
လို့ သူငယ်ချင်း အဖေက မယုံသလို နဲ့ ပြောလိုက်တယ်။

ဆရာကြီး က ပါးစပ် က ဘာတွေမှန်း မသိဘူး ထပ်ရွတ်တယ်။ အုပ်ထားတဲ့ လက်က မီးတွေ ထတောက်လာတယ်။ မီးတောက်တွေက တစ်ဖြည်းဖြည်း ဖန်ခွက် ထဲကို ကူးသွားပြီး မဲမဲ အငွေ့တွေကို ဆက်ပြီးလောင် တယ်။ သိပ်မကြာပါဘူး။ အငွေ့တွေ ဖန်ခွက်ထဲမှာ ကုန်သွားတယ်။

ဆရာကြီး က ရွတ်တာကို ရပ်လိုက်ပြီး..............
" ဖြစ်စေချင်သလို လုပ်ပေးပြီးပြီ ၊ သေတဲ့ သူက သေပြီ၊ အဲ့ဒီ သေတဲ့ သူက မင်းတို့ ရွာသားပဲ ၊ မယုံရင် သွားပြန်ကြည့်လိုက်ပေါ့ကွာ၊ ဆိုပြီး အပြင်ထွက်သွားတယ်။

မြန်လိုက်တဲ့ ခြေလှမ်း သူ့နောက်က ကျနော်ပြေးလိုက်သွားတာ လုံးဝပျောက်သွားပြီ ၊ လိုက်မေးကြည့်တော့လည်း ဘယ်သူ မှ မတွေ့ဘူးတဲ့၊ ကျနော် ကြောင်သွားတယ်။ ကျနော် လည်း မရှာတော့ပဲ လူနာ အခန်း ကို ပြန်လာခဲ့တယ်။ အခန်းထဲမှာ အကုန်လုံး တစ်ယောက် တစ်ပေါက် နဲ့ ညံနေကြတယ်။

သူငယ်ချင်းတို့ သားအမိ ကဆေးရုံ က ဆင်းဖို့ပြင်နေကြတယ်။ ကျနော်လည်း ပစ္စည်းတွေ ဝိုင်းသိမ်းပြီး
သူတို့နဲ့ အတူလိုက်ပြန်လာခဲ့တယ်။ ရွာရောက်တော့ ဒေါ်ဘုတ်ဆုံကြီးသေပြီတဲ့ ။

နေ့လည်တုန်းက တစ်ယောက်တည်း လူးလိမ့်ပြီး ပူတယ် ပူတယ်နဲ့ အော်နေတော့တာပဲ ပြီးတော့ တစ်ကိုယ် လုံး မီးလောင်ထားသလို မဲပြီး သေသွားတာတဲ့။ တစ်ချို့က သူမွေးထားတဲ့ အကောင်တွေ ပြန်သတ်သွားတာတဲ့ ။ အမျိုးမျိုး ဝေဖန်ကြတော့တယ်။ အဖြစ်မှန် ကိုတော့ ကျနော် နဲ့ သူငယ်ချင်းတို့ မိသားစု က လွဲပြီး ဘယ်သူမှ မသိပါဘူးဗျာ။

ဖိုးသူတော် (www.phothutaw.com)
Credit: သရဲလေး sky