18 December 2015

မိရိုးဖလာ စီးပွားရေး လုပ်ငန်းတွေ ကို ဘယ်လို ကယ်တင်ကြမလဲ


 မိရိုးဖလာ, စီးပွားရေး, မန္တလေး
 မန္တလေးမြို့လည် က စီးပွားရေးကြော်ငြာ ဆိုင်းပုဒ်များ (ဓာတ်ပုံ – တေဇလှိုင်/ဧရာဝတီ)

 

မြန်မာ့ စီးပွားရေးလောက အတွင်း က မိရိုးဖလာ စီးပွားရေး လုပ်ငန်းတွေ ရေရှည် တည်တံ့ ဖွံ့ဖြိုးဖို့ ၀ိုင်းဝန်း လုပ်ဆောင်ကြရတော့မယ့် အချိန်ရောက်လာပါပြီ။
 
မိရိုးဖလာ လုပ်ငန်းတွေ ထဲမှာ စားသောက်ကုန် လုပ်ငန်းတွေ၊ ကုန်ထုတ်လုပ်မှု လုပ်ငန်းတွေ၊ ၀န်ဆောင်မှု လုပ်ငန်းတွေ ပါဝင်တယ်။ လက်ရှိ အခြေအနေ မှာ လုပ်ငန်းအများစု က တိုးချဲ့နိုင်ဖို့ အသာထား လုပ်ငန်း မပြိုလဲအောင် ကျားကန်နေကြရတယ်။

မန္တလေးမြို့ မှာ အထင်ကရ ရှိတဲ့ မလိုင်ပေါက်စီဆိုင် ဟာ တမြို့လုံးပေါင်း လို့ လက်တစ်ဖက် (၅ဆိုင်) မပြည့်တော့ ဘူး။ ကား ပစ္စည်း၊ ဆိုင်ကယ် ပစ္စည်း ပြုလုပ်ပေးတဲ့ တွင်ခုံ ဆရာ အချို့ ဈေးထည် ပစ္စည်း ပြောင်း လုပ်နေကြရတယ်။ 

အိမ်တော်ရာ ထီး လုပ်ငန်း ပျောက်ကွယ် သွားတာ ကာလ အတော်ကြာပြီ။ မြို့ မျက်နှာဖုံး အဖြစ် ဂုဏ်သိက္ခာ ရှိရှိ တလျှောက်လုံး ရပ်တည် ခဲ့တဲ့ ကုန်စည်ဒိုင် က ပွဲစားကြီး အချို့ ခေတ်ကာလ အလိုက် ရောင်းရေးဝယ် တာ ပုံစံပြောင်းသွားလို့ လုပ်ငန်း နားထားရတယ်။
 
နည်းပညာ လှိုင်းလုံးတွေ တ၀ုန်းဝုန်းအောက်မှာ အချို့ လုပ်ငန်းတွေ ၀ါးမျို  ခံလိုက်ကြရတယ်။ နည်းပညာက ကမ္ဘာကြီးကို ရွာကြီး တစ်ရွာ ဖြစ်စေခဲ့တယ်။

 မြန်မာနိုင်ငံ လို တတိယ ကမ္ဘာက နိုင်ငံ မဆို ထားနဲ့။ စက်မှု ထိပ်သီးနိုင်ငံတွေသည်ပင် နည်း ပညာစက် ကွင်း က မလွတ် ခဲ့ဘူး။ ကက်ဆက်တွေ ဗီဒီယိုပြစက်တွေ အပြိုင် အဆိုင် ထုတ်လုပ်ရောင်းချ လို့ ကောင်းနေ ဆဲမှာ ပဲ စီဒီ ဖွင့်စက်တွေ ဒီဗီဒီ ဖွင့်စက်တွေ ပေါ်လာတော့ ဂျပန်နိုင်ငံ က ဧရာမ အီလက်ထရောနစ် ကုမ္မဏီတွေ လည်း ခွက်ခွက်လန် အရှုံးပေါ်ကုန်တယ်။ 


စီအီးအိုတွေ နုတ်ထွက်ပေးလိုက် ရတဲ့ သာဓက တွေရှိခဲ့တယ်။ မနေ့ တနေ့က အထိ အမ်ပီသရီး အမ်ပီဖိုး ပလေယာတွေ ကို ကျနော်တို့ဆီမှာ တောရောမြို့ပါ အသုံး တည့်ခဲ့ကြတယ် မဟုတ် လား။ အခု အဲဒါတွေ ဘယ်သူ မှ မကိုင်ကြတော့ဘူး။ စမတ်ဖုန်းတွေ က ဘက်စုံသုံး ပစ္စည်းဖြစ်လာနေကြပြီ။
 
တကယ်တော့ လက်တွေ့ လုပ်နေရတဲ့ ပြည်တွင်း က မိရိုးဖလာ လုပ်ငန်းရှင်တွေ မှာ အခက်အခဲ များစွာ ရှိနေ တယ်။ အထူး သဖြင့် ကုန်ထုတ် လုပ်ငန်း လုပ်ကိုင်နေကြသူတွေ မှာ နည်းပညာ၊ ငွေကြေး အရင်းအနှီး ၊ ဈေး ကွက် စတဲ့ အကန့်အသတ်တွေ ရှိနေကြတယ်။ 

အိမ်တွင်းမှု လုပ်ငန်းတွေမှာ ပိုပြီး အခက် အခဲကြုံကြရတယ်။ အိမ်တွင်းမှု လုပ်ငန်းဖြစ်လို့ ထွက်ကုန် များများ ရအောင်မလုပ်နိုင်ဘူး။ ကျွမ်းကျင် လုပ်သား ရှားပါးတယ်။ နည်းပညာ နဲ့ အလှမ်းဝေး လို့ လူအား နဲ့ အားစိုက် လုပ်နေကြရ တယ်။ 

ထွက်ကုန် အရေအတွက် နည်းလွန်း တာကြောင့် ဈေးကွက် ထဲမှာ ကျယ်ကျယ်ပြန့်ပြန့် မထိုးဖောက်နိုင်ဘူး။ အရင်း အနှီး အများကြီး မစိုက်ထုတ်နိုင်ဘူး။
 
သီတင်းကျွတ် ကာလ မှာ ပို သိသာတယ်။ မိရိုးဖလာ မီးပုံး လုပ်သူတွေ တဖြည်းဖြည်း နည်းလာနေ တယ်။ တရုတ်နိုင်ငံ လုပ် ရောင်စုံ မီးပုံးတွေ ကိုသာ ဈေးကွက်မှာ အတွေ့ရ များလာ တယ်။ ပြည် တွင်းဖြစ် ရောင်စုံ မီးပုံးတွေ က လက်နဲ့ လုပ်ရတာ ဖြစ်လို့ အမြောက်အမြား လည်း မထုတ်နိုင်ဘူး။ 

တရုတ်ပြည်လုပ် ရောင်စုံ မီးပုံးတွေက လိုသလောက် ရတယ်။ စက်နဲ့ လုပ်တာ ဖြစ်လို့ သပ်ရပ်မှု ပို တယ်။ ဈေး ကွက် ၀ယ်လိုအား ရှိသလောက် ထုတ်ပေးနိုင်တယ်။ ဖိနပ် လုပ်ငန်းတွေလည်း ဒီအတိုင်း ပဲ။ ပြည်တွင်းဖြစ် ဖိနပ်တွေ က ခိုင်ခံ့မှု မှာ သာပေမယ့် ဈေးကွက် မှာ ပြည်ပ က ဖိနပ်တွေသာ များတယ်။
 

သုံးစွဲသူတွေ ရဲ့ ခံယူချက် ကလည်း ပြောင်းလာတယ်။ ခိုင်ခံ့ တဲ့ ဖိနပ်တရံ ကို အကြာကြီး စီးတာ ထက် ဈေး သင့်ပြီး ဒီဇိုင်း ဆန်း တဲ့ ဖိနပ်တွေကို ပဲ သုံးလေးရံ ပြောင်းပြီး ထည်လဲ ထည်ချွတ် စီးတဲ့ သူတွေ ပိုများလာ တယ်။ 

ဖိနပ်တရံ ကို မပျက် မချင်း စီးမယ် ဆိုတဲ့ သူက ဒီနေ့ခေတ် မှာ မရှိသလောက် နည်းသွားပြီ။ (အရင်ကတော့ ဖိနပ်သဲကြိုးပြတ်ခဲ့ရင်တောင် သဲကြိုး လဲ လှယ်ပြီး စီးခဲ့ကြရတာပါ။) မိရိုးဖလာ လုပ်ငန်းတွေ ရေရှည် မရပ် တည်နိုင်တာ စာရင်း ဇယား မနိုင်နင်း တာလည်း အဓိက ကျတဲ့ အချက်ထဲမှာ ပါတယ်။ 

မိရိုးဖလာ လုပ်ကိုင်နေကြတဲ့ လုပ်ငန်း အချို့ အခုချိန်ထိ စာရင်း မရှိ အင်းမရှိ လည်ပတ်နေကြဆဲဖြစ်တယ်။ ရရန်ပေးရန် စာ ရင်း သွင်းထားတဲ့ လုပ်ငန်းရှင် က နည်းပါးတယ်။ ဘဏ် နဲ့ ချိတ်ဆက် လုပ်ကိုင်တဲ့သူ အရေ အတွက် နည်းပါးနေသေးတယ်။ ရောင်းရတဲ့ ပိုက်ဆံ သေတ္တာထဲထည့်၊ ကုန်ဖိုး ရှင်းတော့ သေတ္တာထဲ က ထုတ် ရှင်း။ ပိုတဲ့ ပိုက်ဆံ ငါ့ ပိုက်ဆံလို့ သဘောထား နေတဲ့လုပ်ငန်းရှင်တွေ အခုထိ ရှိနေသေးတယ်။
 
မဝေးတော့တဲ့ ကာလ မှာ AFTA (လွတ်လပ်သော အာဆီယံ ကုန်သွယ်ရေးနယ်မြေ) ကရောက်လာတော့မှာ ပါ။ ပြည်တွင်း က မိရိုးဖလာ လုပ်ငန်းတွေ ဘယ်လို ရပ်တည်ကြမလဲ။ အခုထဲက ပြင်ဆင် ထားပါမှ တော်ကာ ကျပါလိမ့်မယ်။

 ဒေသတွင်း နိုင်ငံတွေ က ထုတ်ကုန်တွေ မပြောပလောက်တဲ့ အခွန်ပမာဏ နဲ့ လှိမ့်ဝင် လာပါလိမ့်မယ်။ တချို့ ထုတ်ကုန်တွေ က အခွန် ကင်းလွတ်ခွင့် နဲ့ အလုံးအရင်း ၀င်လာဖို့ တာစူနေကြတယ်။ 

အခုချိန်မှာ ကတည်းက ကြိုတင်ပြင်ဆင် မထားရင်လှိမ့်နေ အောင် ခံကြရမှာပါ။ အဲဒီ အချိန်ရောက် မှ သူများ ပစ္စည်း ယူရောင်းနေရင် အလုပ်ဖြစ်မှာ မဟုတ်ဘူး။ ကိုယ့် အမှတ်တံဆိပ် နဲ့ ကိုယ် ဂုဏ်သိက္ခာ ရှိရှိ ထုတ် လုပ်ရောင်းချနေသူ သာ ရှင်သန် ကျန်ရစ်မှာဖြစ်တယ်။

ကျနော်တို့ဆီ က မိရိုးဖလာ လုပ်ငန်းအချို့ က အခုချိန်ထိ ဆိုင်ခွဲ မရှိ (ပင်ရင်းဆိုင်) ဆိုတဲ့ ဆိုင်းဘုတ်ကို အမြတ် တနိုး ချိတ်ဆွဲ နေကြဆဲဖြစ်တယ်။ နိုင်ငံတကာ မှာတော့ ကိုယ့် လုပ်ငန်း ကို ကမ္ဘာဖြန့်ကြက် ချိတ် ဆက် နိုင်ဖို့ကြိုးစားနေကြပြီ။ 

ကမ္ဘာကျော် KFC ကြက်ကြော် ကို ရန်ကုန်မြို့မှာ တင် စားသုံး လို့ ရနေပြီ။ ကျနော်တို့ က အခုချိန်ထိ လက် ညှစ် ရခိုင် မုန့်တီ ဆိုပြီး ပုံမှန် ဖောက်သည်တွေကို သာ ဦးတည်ရောင်းချနေဆဲဖြစ်တယ်။ အနုပညာ မှာ လက်ဖြစ် (hand made) က ကောင်းပေမယ့် စီး ပွားရေး ကုန်ထုတ်လုပ်မှု မှာတော့ စံချိန် မတိမ်းစောင်းစေဘဲ အမြောက်အမြား ထုတ်နိုင်တာ ဈေးကွက် ပိုကျယ်ပြန့် စေတယ် မဟုတ်ပါလား။
 
အားကစား ၀တ်စုံတွေ ချုပ်တဲ့ ကမ္ဘာကျော် adidas ကုမ္ပဏီကြီး က လုပ်အားခဈေးချို တဲ့ ဘင်္ဂလားဒေ့ရ်ှနိုင်ငံ ဘက် လှည့်ပြီး ရင်းနှီးမြှုပ်နှံနေချိန် မှာ အရပ်ထဲ က စက်ချုပ်ဆိုင် က ဦးလေးကြီး ရဲ့ဆိုင်ရှေ့မှာ မူလ (လက်ဟောင်း) စက်ချုပ် ဆိုင် ဆိုင်ခွဲ မရှိပါ ဆိုတဲ့ ဆိုင်းဘုတ် က ဆိုင်ရှေ့မှာ အခန့်သား နေရာယူထား တယ်။ 

ကျနော်တို့ ဆီက မိရိုးဖလာ လုပ်ငန်းတွေ နည်း ပညာက ရှေ့ဆောင်နေတဲ့ ခေတ်သစ် ကမ္ဘာကြီးမှာ ဘယ်လို တိုးဝင်ကြ မလဲ။ ၀ိုင်းဝန်း စဉ်းစားကြစေလိုပါတယ်။



(သန်းနိုင်ဦးသည် မန္တလေးအခြေစိုက် သတင်းစာ ဆရာတဦး ဖြစ်သည်)


No comments:

Post a Comment